Que é esto?

Este blogue non pretende agrupar todas as respostas – tarefa inconmensurábel, por outra parte – se non aportar chaves e camiños para descubrir.

Trátase de presentar na rede o noso patrimonio románico, o da comarca de Lemos, para que se coñeza e nos coñezamos, para que sirva de ponte entre nós e o mundo.

Aínda ningún organismos público pensou en facer un gran portal web sobre o románico das comarcas da chamada Ribeira Sacra, e é por iso que nace este blogue, para suplir (polo menos para a comarca de Lemos) o que os cartos públicos non fan – aínda que deberan -.

Malia que elaborada de xeito individual, esta é unha obra colectiva, que se nutre dos traballos que se publicaron sobre o noso románico, das fotografías de xente coñecedora dos camiños de Lemos, das aportacións orais de múltiples persoas... É obra común e pretende que o románico de Lemos sexa de desfrute común. Aínda está comezando, queda moito por rematar, está “abocetada” - coma os capiteis do arco faixón da igrexa de Proendos - mais están postos os alicerces para medrar e construír sobre a pedra angular.

O románico é unha das sinais de identidade das comarcas da Ribeira Sacra, polo que ben merecería unha posta de longo na rede ben mellor ca esta, pero esta é a que dimos feito, sen axuda pública algunha.

Comezamos pois con esta ventá aberta ao románico da comarca de Lemos, agardando que as colaboracións enchan este espazo e contribúan a vivir o noso Patrimonio, que é do que se trata.

Que o sorriso pícaro do monstro da igrexa de Pinol garde por moitos anos o noso legado románico!